படித்ததில் பிடித்தது

வலையுலகப் படைப்பாளிகள்

2010-01-01T09:41:00.000-08:00

எழுத்துலகில் இது தலைமுறை மாற்றத்திற்கான தருணம். பத்திரிகைகளுக்கு படைப்புகளை அனுப்பி விட்டு , அது பிரசுரமாகும் நாளுக்காகக் காத்திருக்கும் தலைமுறையின் காலம் கடந்து போய்க் கொண்டிருக்கிறது. பெரிய பத்திரிகையில் படைப்புகள் பிரசுரமாகின்றன என்பது படைப்பாளிக்குப் பெருமைதான். ஆனால் அது நடக்காவிட்டால் , அந்தப் படைப்புகள் குப்பைக்கூடைக்குத்தான் போக வேண்டும் என்று இன்றையத் தலைமுறை எண்ணிக் கொண்டிருக்க வில்லை.

இந்தக்கால இளைஞர்கள் எதை வேண்டுமானாலும் எழுதுகிறார்கள். சொல்ல வந்ததைத் தைரியமாகச் சொல்கிறார்கள். பிறரிடம் கருத்துக் கேட்கிறார்கள். விரிவான வாசகர் வட்டத்தையும் உருவாக்கிக் கொள்கிறார்கள். கட்டற்ற விடுதலை உணர்வு அவர்களிடமிருந்து வெளிப்படுகிறது. இவற்றை எல்லாம் சாத்தியமாக்க அவர்களுக்கு உதவி இருப்பது இணையம்.

உலகளாவிய வலை, மின்னஞ்சல் போன்ற நிலைகளைத் தாண்டி வேறொரு பரந்த வெளியில் இணையம் பயனிக்கத் தொடங்கி சில ஆண்டுகளாகி விட்டன. இந்தத் தலைமுறையினர் ஃபேஸ்புக்கையும் ட்விட்டரையும் தெரியாதவர்களை படிப்பறிவில்லாதவர்கள் எனச் சீண்டுகிறார்கள். வலைப்பூ இல்லா விட்டால் முகவரி இல்லாதவர்களைப் போலப் பார்க்கிறார்கள்.

தமிழைப் பொறுத்த வரை, வலைப்பூக்கள் தான் கருத்துகளைச் சொல்லும் படைப்புகளை வெளியிடும் தளங்களாக இருக்கின்றன. இதைப் படைப்பவர்களைப் பதிவர்கள் என்கிறார்கள். பொறியியல் வல்லுனர்கள் எழுதும் கவிதைகளையும், குடும்பத் தலைவிகள் செய்யும் நையாண்டிகளையும், இலக்கியவாதிகள் எழுதும் சினிமா விமர்சனங்களயும் வலைப்பூக்கள் நம்க்கு அறிமுகம் செய்கின்றன. ஒவ்வொருவரும் தமது துறை தாண்டிய படைப்புகளை இங்கு வெளியிட முடிகிறது. யாரும் முழுமையாக அடையாளப் படுத்திக் கொள்ள வேண்டியதில்லை என்பதால், துணிச்சலான, வித்தியாசமான பலதரப்பட்ட கருத்துகள் வெளியிடப்படுகின்றன. அந்த வகையில் எந்தக் கொள்கைகுள்ளும் முடங்கிப் போகாத ஊடகங்களாவே இந்த வலைப்பூக்கள் கவனிக்கப்படுகின்றன. அரசியல் வாதிகள், சினிமாக்காரர்கள், வேறு வகையில் புகழ் பெற்றவர்கள் எல்லாம் வலைப்பூக்களை மேய்ந்தால், தங்களைப் பற்றிய உண்மையான் விமர்சனத்தைத் தெரிந்து கொள்ள முடியும் என்றே சொல்லலாம். நாடு, இனம் மதங்களைக் கடந்த நட்பு வட்டத்தினை உருவாக்கிக் கொள்வதற்கும் வலைப்பூக்கள் வாய்ப்புகளை வழங்கி இருக்கின்றன. வாசகர் வட்டங்களைப் போலவே பதிவர் வட்டங்களும் கூட்டமைப்புகளும் உருவாக்கப்பட்டிருக்கின்றன. பதிவர்கள் அவ்வப்போது கூட்டங்கள் நடத்தி தங்கள் கருத்துகளைப் பகிர்ந்து கொள்வதுடன் வலைப்பூக்களில் வெளியிடவும் செய்கின்றனர்.

நர்சிம், பரிச்லகாரன், வால்பையன், கேபிள் சங்கர், பழமைபேசி, பைத்தியக்காரன், அனுஜன்யா, அபி அப்பா, கார்க்கி, அகல்விளக்கு, க.பாலாசி, நசரேயன் , நேசமித்திரன், அமிர்தவர்ஷினி அம்மா, சோம்பேறி என வித்தியாசமான புனைப்பெயர்களுடன் பதிவிடும் வலைப்பதிவர்கள் நிறைய எழுதுவதுடன் பரந்து விரிந்த நட்பு வளையத்தையும் கொண்டிருக்கிறார்கள். நேரடியாக நட்புக் கொள்வதில் இருக்கும் சில சங்கடங்கள் இல்லை என்பதை இந்த நட்பு வட்டத்தின் சிறப்பாகக் கருதலாம்.

வலைப்பூக்களில் பெண்களின் ஆதிக்கம் குறிப்பிடத் தகுந்த அளவுக்கு இருப்பது வரவேறகத் தகுந்த ஒன்று. வலைப்பதிவிடும் பெண்கள் பெரும்பாலும் கவிதை எழுதுகின்றனர் அல்லது சமையல் குறிப்புகள் வழங்குகின்றனர். வாழ்க்கை அனுபவங்கள், குடும்பப் பிரச்னைகள். அம்மாக்களுக்கான ஆலோசனைகள், திரைப்பட தொலைக்ட்சி விமர்சனங்கள், என இவர்களது எழுத்து வட்டம் கொஞ்சம் அடக்கமானதாகவும் பொறுப்புணர்வுடன் கூடியதாகவும் இருக்கிறது. சில பெண் படைப்பாளிகள் அரசியல் சமூகச் சிந்தனைகளையும் விதைக்கின்றனர். ஃப்ஹீமாஜஹான், நளாயினி, புதிய மாதவி, தமயந்தி, சாந்தி லட்சுமணன், கலகலப்ரியா, ராமலக்ஷ்மி, ரம்யா, கிருபாநந்தினி, மதுமிதா, தாரணி ப்ரியா, பெரியார் தமிழச்சி, மாதங்கி, விக்னேஷ்வரி, மழை ஷ்ரேயா போன்ற நூற்றுக்கணக்கானோர் ஆக்கப்பூர்வமான், அபூர்வமான் படைப்புகளை பதிவிடுகின்றனர். தமிழ் இலக்கியங்களையும் மரபு வழி தமிழ் ஆராய்ச்சிகளையும் அடுத்த கட்டத்துக்குக் கொண்டு செல்லும் வகையில் சில வலைப்பூக்கள் செயல் படுகின்றன. மு.இளங்கோவன், இரா.குணசீலன், கல்பனா சேக்கிழார், எம்.ஏ.சுசீலா, நா.கணேசன். சுப்ரபாரதி மணியன், அழகிய சிங்கர் போன்றவர்கள் வலைப்பூக்களில் இலக்கியப்பணி செய்கின்றனர். கவிதைகள், இலக்கியக் கூடல்கள், புத்த்க வெளியீட்டு விழாக்கள் போன்றவை இவர்களின் வலைப்பூக்களை ஆக்கிரமித்திருக்கின்றன.

இன்னும் சிலர் தொழில் நுட்பம் தொடர்பான் தகவல்களையும் உதவிகளையும் தமிழில் தருகின்றனர். இது போன்ற முயற்சிக்கு வலைப்பதிவர்கள் மத்தியில் பெரும் ஆதரவு இருக்கிறது. இவற்றுக்கிடையே ஜெயமோகன், பாமரன், மனுஷ்யபுத்திரன், எஸ்.ராமகிருஷணன், மாலன், ஞானி, சாரு நிவேதிதா போன்ற பிரபலங்கள் பலரும் வலைப்பூக்கள் வழியாக வாசகர்களைச் சந்தித்துக் கொண்டிருக்கிறார்கள்.

ஒட்டு மொத்தமாகக் கூறுவதென்றால் வலைப்பூக்கள் ஊடகங்களின் முழுச் சுதந்திரம் கொண்ட நவீன பரிமானங்களாக உருவெடுத்திருக்கின்றன. அமெரிக்க அதிபர் தேர்தலில் ஒபாமாவை வெற்றி பெறச் செய்ததில் வலைப்பதிவர்களுக்கு பெரும் பங்கு உண்டு. வெளிநாடுகளில் சந்தைக்கு வரும் தயாரிப்புகளை மக்களிடம் கொண்டு சேர்க்க வலைப்பூக்கள் பயன்படுத்தப்படுகின்றன. இவற்றிலிருந்து வலைப்பூக்களின் வீச்சை அறிந்து கொள்ள முடிகிறது.

இன்னும் சில காலம் போனால் மரபு வழி ஊடகங்களுக்கு இணையாக , வலைப்பூக்கள் மாதிரியான இணைய வழி ஊடகங்களுக்கும் செல்வாக்கு கிடைத்துவிடும். இதை மரபு வ்ழி ஊடகங்களுக்கான அச்சுறுத்தலாகக் கருத முடியாது. ஆயினும் ஊடகங்களின் பரிமானம் மாறிக்கொண்டிருப்பதைப் புரிந்து, வலைப்பதிவர்களுடன் சமநிலைப்படுத்திக் கொள்ள மரபுவழி ஊடகங்களும் தயார்கிக் கொண்டிருக்கின்றன.

புத்தாண்டின் முதல் நாள் அன்று வெளியான தினமணி பத்திரிகையில் வெளிவந்த - எம்.மணிகண்டன் எழுதிய கட்டுரை.

அனைவருக்கும் இனிய இதயங்கனிந்த புத்தாண்டு நல்வாழ்த்துகள்

நட்புடன் சீனா

திறமை எனில் என்ன ? திருப்தி எனில் என்ன ?

2009-06-26T20:01:00.000-07:00

அருமை அன்பர் அராதா அன்புடன் குழுமத்தினில் பகிர்ந்த ஒரு இழையினை இங்கு இடுகையாகப் போடுவதில் மனம் மகிழ்கிறேன்

Excellence...

A German once visited a temple under construction where he saw a sculptor making an idol of God.
Suddenly he noticed a similar idol lying nearby. Surprised, he asked the sculptor, "Do you need two
statues of the same idol?" "No," said the sculptor without looking up, "We need only one, but the first
one got damaged at the last stage." The gentleman examined the idol and found no apparent damage.
"Where is the damage?" he asked. "There is a scratch on the nose of the idol." said the sculptor, still
busy with his work. "Where are you going to install the idol?"

The sculptor replied that it would be installed on a pillar twenty feet high. "If the idol is that far, who is
going to know that there is a scratch on the nose?" the gentleman asked. The sculptor stopped
work, looked up at the gentleman, smiled and said, "I will know it."

The desire to excel is exclusive of the fact whether someone else appreciates it or not. "Excellence" is a
drive from inside, not outside. Excellence is not for someone else to notice but for your own satisfaction and efficiency...

நட்புடன் ..... சீனா

பெற்றோர்கள் மன்னிக்கவும்

2009-01-16T16:54:00.000-08:00

எனதருமை நண்பர் தமிழன் வேணு எழுதிய கொன்றை வேந்தன் 2008
------------------------------------------------------------------
கொன்றைவேந்தன்-2008
------------------------------------
அவசரச்செலவுக்கு அன்னையைக் கேளு
ஆலய வாசலில் தாவணி பாரு
இங்கிலீஷிலே எப்பவும் பேசு
ஈ.ஸி.ஆர்.ரோட்டில் ஓட்டிப்பழகு
உள்ள பணத்தை ஜொள்விட்டு அழி
ஊரில் உள்ள தியேட்டர்கள் அறி
எல்லாப்படத்தையும் முதல் நாள் பாரு
ஏ.டி.எம்.கார்டை எப்போதும் வை
ஐ லவ் யூவென சொல்லிப் பழகு
ஒவ்வொருநாளும் சட்டை மாற்று!
ஓஹோவென்று ஃபிகரைப் புகழ்
ஔவையாருக்கும் பேத்தி இருப்பாள்
அஃக்கன்னாவில் ஒண்ணுமேயில்லை

கற்பு எனப்படுவது குஷ்பூவின் கருத்து
காசில்லார்க்குக் காதலி இல்லை
கிண்டல் செய்வது மாணவர்க்கழகு
கீழ்ப்பாக்கத்திலும் அறிஞர்கள் உண்டு
குறும்பாய் தினசரி குறுஞ்செய்தி அனுப்பு
கூட்டம் இருக்கிற பேருந்தில் ஏறு
கெஞ்சிக்குழைவது ஜொள்ளர் கடமை
கேவலப்படுத்துதல் கேர்ள்-ஃபிரண்ட் இயல்பு
கைபேசி மாடலை அடிக்கடி மாற்று
கொஞ்சம் கொஞ்சம் தமிழிலும் பேசு
கோபம் வந்தால் வீட்டிலே காட்டு
கௌபாய் போல ஊரை சுற்று

சத்யம் தியேட்டர் சாலவும் நன்று
சாகிறவரைக்கும் மொக்கை போடு
சிகரெட் பிடித்தால் மறைந்து ஊது
சீறும் பல்சரை தினசரி ஓட்டு
சும்மாயிருந்தால் கவிதை எழுது
சூடும் சொரணையும் காதலர்க்கில்லை
செல்போன் ரிங்டோன் அடிக்கடி மாற்று
சேரும் நண்பர்கள் ஜேப்பைக் கவனி
சைட்டடிப்பதற்கு கூலிங்-கிளாஸ் போடு
சொட்டைத்தலையில் தொப்பியை அணி
சோதாநண்பர்கள் உடன்வரும் சனி

தந்தைபர்ஸ் மிக்க ஏ.டி.எம்.இல்லை
தாய் ரிமோட் எடுத்தால் நெடுந்தொடர் தொல்லை
திரைப்படப்பாட்டைத் தினசரி ஓது
தீனியைக் குறைத்தால் தொப்பை வராது
துட்டுள்ளவரை தான் உடன்வரும் நட்பு
தூக்கம் வரும்வரை எஃப்.எம்.கேளு
தெளிவுடையோரைத் தூர விலக்கு
தேடிப்போனால் பாட்டியும் முறைப்பாள்
தைத்ததை விடவும் ரெடிமேட் நன்று
தொலைந்த செல்போன் திரும்ப வராது
தோழனுடன்போய் ஜொள்ளுதல் தீது

நமீதா நாமம் நயம்பட உரை
நான்கில் ஒரு ஃபிகர் நிச்சயம் தேறும்
நித்தம் செல்லை டாப்-அப் பண்ணு
நீள எஸ்.எம்.எஸ். அனுப்புதல் தவிர்
நுரைவரும் பீரை வெயிலில் பருகு
நூல்விடாமல் ஃபிகர் கிடைக்காது
நெட்டை ஃபிகரும் ஒட்டடைக்கு உதவும்
நேரம் கிடைத்தால் பாடமும் படி
நையப்புடைப்பது அப்பா கடமை
நொண்டிச்சாக்கு தினசரி புகல்
நோட்டில்லேன்னா கேட்டுக்கு வெளியே!

படங்கள் தனியாய்ப் பார்ப்பது பாவம்
பாஸும் ஃபெயிலும் படிப்பதைப் பொறுத்து
பில்லியன் சீட்டிற்கு ஃபிகரே பெருமை
பீஸைத் தின்றால் ஹால்-டிக்கெட் இல்லை
புத்தகம் இருப்பது ஃபோட்டோ வைக்க
பூசை என்பது தண்ணியடித்தல்
பெண்கள் காலேஜ் புண்ணியதீர்த்தம்
பேசிக்கொல்வது பெண்டிர் இயல்பு
பையனைப் போலே பல்லைக்காட்டாதே
பொதுவிடம் என்றால் முதுகில் கவனம் வை
போன செமஸ்டர் திரும்ப வராது

மன்மதக்குஞ்சு நீயென்றுணர்
மாமிகள் நட்பு ஆபத்துக்குதவும்
மிஞ்சும் பெண்ணிடம் கெஞ்சுதல் நன்று
மீட்டர் இல்லா ஆட்டோ காதல்
முற்பகல் காட்சியை முதல்நாள் பாரு
மூன்றாண்டில் டிகிரி முடிப்பவன் மேதை
மென்ட்டல் என்பவன் தினசரி படிப்பவன்
மேட்னி போகக் கூட்டணி சேரு
மையிடும் பெண்கள் பழையபஞ்சங்கம்
மொறைக்கிற பெண்ணைத் துரத்துதல் தவிர்
மோட்சம் அளிப்பது ஃபிகரின் புன்னகை

வண்டியிருப்பது ஊர் சுற்ற உதவும்
வாட்டமளிப்பது கோடை விடுமுறை
விடாமல் தொடரும் வித்தையில் தேறு!
வீட்டுக்குப் போனால் விழுந்திடும் உதை
உடான்ஸ் விடுகையில் கவனம் தேவை
ஊக்கம் தருவது ஓரக்கண் பார்வை
வெட்டிப்பொழுதில் வெளியே திரி
வேஸ்ட் எனப்படுவது ஃபிகர்களில் இல்லை
வைதிடும் பெண்ணைக் கைதொழுதிடு
ஒரு ஃபிகர் இருக்க மறு ஃபிகர் தவிர்
ஓட்டைவாய்நண்பனை ஒதுக்கிடல் நன்று
---------------------------------------------------

உழவர் திருநாள் நல்வாழ்த்துகள்

2009-01-15T08:45:00.000-08:00

நுகர்ந்தால் இன்பம் நுகர்ந்தால்
வருவது மகிழ்வு !
பயின்றால் மறை பயின்றால்
வருவது பண்பு !
கனிந்தால் மனம் கனிந்தால்
வருவது அன்பு !
கொடுத்தால் பொருள் கொடுத்தால்
வருவது உறவு !
பொறுத்தால் பிழை பொறுத்தால்
வருவது நட்பு !
உணர்ந்தால் துன்பம் உணர்ந்தால்
வருவது தெளிவு !
வேர்த்தால் உடல் வேர்த்தால்
வருவது பொலிவு !
கோர்த்தால் கை கோர்த்தால்
வருவது உயர்வு !
அகழ்ந்தால் நிலம் அகழ்ந்தால்
வருவது ஊற்று !
திறந்தால் வாசல் திறந்தால்
வருவது காற்று !
அறிந்தால் உனை அறிந்தால்
வருவது ஞானம் !
உதவினால் பகட்டின்றி உதவினால்
வருவது தெய்வம் !
--------------------------------------------
அனைவருக்கும் இனிய உழவர் திருநாள் நல்வாழ்த்தாக எனதருமை நண்பர் ராஜூ எழுதி அனுப்பிய வாழ்த்து மடல்
-------------------------------------------

நலம் சேர வாழ்த்துவது
நட்புடன் ..... சீனா
----------------------

பிள்ளையார் சுழி

2008-10-12T00:30:00.000-07:00

தஞ்சாவூர்க் கவிராயர் என்றொரு தனிச்சுற்றுக்கான காலாண்டிதழில் வெளி வந்த இரு கவிதைகள்.

பிள்ளையார் சுழி :
-------------------------

ஆற்றங்கரைப்
பிள்ளையாருக்கு
கிராமத்துப்
பெண்டுகள் மீது
கோபமோ கோபம்.
என்னை
வணங்காவிட்டாலும்
பரவாயில்லை
ஒரு ஆண்பிள்ளையாய்
நடத்தக்கூடாதா ?
குளித்துவிட்டு வந்து
ஈரப்புடவையை
என்பக்கம் திரும்பி நின்றா
மாற்றிக் கொள்வார்கள்.
சீச்சீ !

எச்சம் :
----------
சிலைகள் தோறும்
காக்கையின் எச்சம்.
வள்ளுவர் சொன்னது
சரி.
தக்கார் தகவிலர் என்பது
அவரவர்
எச்சத்தாற்
காணப்படும் !

நன்றி : தினமணி - தமிழ் மணி - 12.10.2008

பேசும் யானை

2008-02-18T16:58:00.000-08:00

அன்புடன் குழுமத்தில், அன்பர் புகாரி அறிமுகப் படுத்திய, தமிழோவியத்தில் பிரசுரமான, ஜான்.பீ.பெனடிக்ட்டின் கவிதை ஒன்று இங்கே :
------------------------------------------------------------------------------------------
பெரிசா எங்களைப் படைச்சதால
பெரிய கோயிலில் நிறுத்திப்புட்டான்
பேச முடியா ஊன ஜாதியை
பிச்சை எடுக்கவும் பழக்கிப்புட்டான்

முழங் கையளவு குச்சியை வைச்சு
முட்டிக்கு முட்டி தட்டுறிய
மூனு மாசத்துக் கொருமுறை தான்
முதுகில தண்ணீ ஊத்துறிய

கால் நகர முடியாம
கட்டிப் போட்டு வாட்டுறிய
கட்டுக்கட்டா கரும்பு திங்கும்
கம்பீரக் கூட்டம் நாங்க
காய்ஞ்சு போன தட்டையை
கால் வயிற்றுக்குப் போடுறிய

என்னைப் பெத்த மவராசி
எந்தக் கோயில் வாசலிலோ
என் வயித்துல புள்ள பூச்சி
எந்தக் காலமோ தெரியலியே

சாமி பேரைச் சொல்லிச் செஞ்சா
சாகடிக்கிறதும் உங்களுக்குக் குத்தமில்லை
சதா காலம் சாவுறதை விட
சட்டுனு சுட்டுப்போடும் வீரப்பன் தேவலைங்க

வருஷத்துல ஒருமாசம் முதுமலை கேம்ப்
வாஸ்து பொலிட்டிசியன் போட்ட பிச்சை
வருஷம் முழுக்க காட்டுக்குள்ளே கூட்டமா
வாழ்வது தானே எங்க ஜனத்தின் ஆசை

வாய் பேச முடிஞ்சதால
வந்தேன் ஜார்ஜ் கோட்டைக்கு
வனத்துறை மந்திரியைப் பாத்து
வயிற்றெரிச்சலைக் கொட்டிப் போட
--------------------------------------------
நன்றி: தமிழோவியம்
நன்றி : அன்புடன் புகாரி
நன்றி : ஜான்.பீ.பெனடிக்ட்

இறைவன் துணைவனா ??

2008-01-07T09:01:00.000-08:00

பாதச்சுவடுகள் அது ஒரு அற்புதமான கனவு....
தன்னந் தனியனாய் அக் கடற்கரை மணலில் வெகுதூரம் நடந்த பின் திரும்பிப் பார்த்தேன். எனது பாதச் சுவடுகள் மிக நீண்ட பாதை போட்டிருந்தன. ஜனன காலத்திலிருந்து நான் நடந்து வந்த பாதையது. எனது வாழ்க்கைச் சரிதம் அங்கம் விடாமல் மௌனக் காட்சியாய் அம்மணலில் தெரிந்தது.

ஓ! இதென்ன? எனது பாதச் சுவடுகளின் அருகில் யாருடையவை இம் மற்றொரு ஜோடி சுவடுகள்? உடனே எனக்குப் புரிந்தும் போயிற்று!புல்லரித்தது.... எனது தேவனின் சுவடுகள் அவை! என்னோடு இப்பயணத்தில் என் தெய்வமுமா உடன் வந்திருக்கிறது? நான் பாக்கியசாலி தான்.

ஆனால், ஆனால்..... நடுநடுவே ஏன் ஒரு ஜோடி மட்டும்? அதுவும் என் வாழ்க்கையின் மிகவும் சோதனையான காலங்களின் போது....எனக்கு ஏமாற்றம் தாங்கவில்லை. தேவா, இவ்வளவு தான் உன் கருணையா? உன்னுதவிக்காக நான் கெஞ்சிக் கரைந்த போது கை விட்டு விட்டாயே என்னை - கூக்குரலிட்டேன் நான்.

அசரிரீயாக பதில் கேட்டது- அந்த ஒற்றை ஜோடிச் சுவடுகள் உன்னுடையவை அல்ல நண்பா, என்னுடையவை. நடக்கவியலாத உன்னை நான் சுமந்து வந்த சுவடுகள்!.

N.Ganeshan - இணையத்தில் தமிழ் வலைப்பூவில் இருந்து
http://enganeshan.blogspot.com/

இது அவர் படித்ததில் அவருக்குப் பிடித்தது
அதை நான் படித்ததில் எனக்குப் பிடித்தது

நாம் இயற்கையிலேயே வன்முறையாளர்களா ?

2007-11-23T14:13:00.000-08:00

மரத்தடி குழுமத்தில் சுரேஷ் கண்ணன் என்பவர் எழுதிய - ஒரு கொரிய திரைப்படத்தின் விமர்சனத்திலிருந்து சில வரிகள் :
--------------------------------------------------------------
என்னதான் நாம் அஹிம்சை, கருணை என்றெல்லாம் தியரிட்டிக்கலாக பேசி சிலாகித்துக்கொண்டாலும் வன்முறை என்பது நம் ரத்தத்திலிலேயே ஊறிப்போன இயற்கையானதொரு அம்சம்.

வெள்ளைப் பேண்ட்டில் சேற்றுச் சக்கரத்தை இடித்து கறையை ஏற்படுத்தும் பைக்ஓட்டுநரை "குழந்தாய்.. கவனமாக செல்லக்கூடாதா?" என்றெல்லாம் நாம் கேட்பதில்லை. "த்தா.... கண்ணு என்னா பின்னாலயே இருக்கு?" என்று ஆரம்பித்து ஏக வசனகலாட்டாவில் முடியும். எதிராளியின் ஆகிருதியைப் பொறுத்து வசவின் அடர்த்தி கூடியோ குறைந்தோ, அல்லது அடிதடியிலோ வெற்று வசனங்களிலோ முடியக்கூடும். 'நான்அப்படியெல்லாம் இல்லை' என்று விவாதிப்போர் கடவுளால் பிரத்யேகமாகஆசிர்வதிக்கப்பட்டவர்கள்.

ஒரு ஆணின் உயிரணுக்கள் பெண்ணின் கருப்பையினுள் வேகமாகபயணம் செய்யும் போது முந்துகின்ற ஓர் அணுவுக்குத்தான் வாசலை முட்டி மோதிஉட்புகுகிற வாய்ப்பு கிடைக்கிறது. அங்கேயே ஆரம்பிக்கின்ற வன்முறையும்போட்டியும் நம் வாழ்நாளின் இறுதி வரை தொடர்வதாக நான் கருதுகிறேன்.

------------------------

கவியரசின் கண்ணன் பாட்டு

2007-10-26T09:43:00.000-07:00

புல்லாங்குழல் கொடுத்த மூங்கில்களே
எங்கள் புருஷோத்தமன் புகழ் பாடுங்களே
வண்டாடும் கங்கை மலர்த் தோட்டங்களே
எங்கள் மதுசூதனன் புகழ் பாடுங்களே
(புல்லாங்குழல்)

பன்னீர் மலர் சொரியும் மேகங்களே
எங்கள் பரந்தாமன் மெய்யழகைப் பாடுங்களே
தென் கோடி தென்றல் தரும் ராகங்களே
எங்கள் ஸ்ரீகிருஷ்ண மூர்த்தி புகழ் பாடுங்களே
எங்கள் ஸ்ரீகிருஷ்ண மூர்த்தி புகழ் பாடுங்களே
(புல்லாங்குழல்)

குருவாயூர் தன்னில் அவன் தவழ்கின்றவன்
ஒரு கொடியோடு மதுராவை ஆள்கின்றவன்
திரு வேங்கடத்தில் அவன் அருள்கின்றவன்
அந்த ஸ்ரீரங்கத்தில் பள்ளி கொள்கின்றவன்
அந்த ஸ்ரீரங்கத்தில் பள்ளி கொள்கின்றவன்
(புல்லாங்குழல்)

பாஞ்சாலி புகழ் காக்கத் தன் கை கொடுத்தான்
அந்த பாரதப் போர் முடிக்க சங்கை எடுத்தான்
பாண்டவர்க்கு உரிமையுள்ள பங்கைக் கொடுத்தான்
நாம்படிப்பதற்கு கீதையென்னும் பாடம் கொடுத்தான்
நாம்படிப்பதற்கு கீதையென்னும் பாடம் கொடுத்தான்
(புல்லாங்குழல்)

புகாரியின் எழுத்துகள்

2007-10-21T11:46:00.000-07:00

கவிதைக்குள் சொல்லைப் பார்ப்பவன் மனிதன்

சொல்லுக்குள் கவிதை பார்ப்பவன் கவிஞன்

நீ விளைத்த பழங்கள் நீ உண்ணமாட்டாய்

நீ உண்ணும் பழங்கள் நீ விளைவித்திருக்க மாட்டாய்

---------------------------------------------------------------------------------

புகாரி தன் சொந்த ஊரான தஞ்சை மாநகரம் பற்றி :

வானூறி மழை பொழியும்

வயலூறிக் கதிர் விளையும்

தேனூறி பூவசையும்

தினம்பாடி வண்டாடும்

காலூறி அழகுநதி

கவிபாடிக் கரையேறும்

பாலூறி நிலம் கூடப்

பசியாறும் தஞ்சாவூர்.

---------------------------------------------------------------------------------

தூரன் குணாவின் கவிதை - கணையாழி 2003

2007-10-15T08:57:00.000-07:00

பூத்திருந்த காலம்

அன்றைய அந்திப்பொழுது

வீடு திரும்புதல்களில்

படிந்திருக்கும் அழுக்கு

புறத்தில் மட்டும்

விளையாட்டில் விட்டுக்கொண்ட

காய் எப்படியும்

பழுத்துவிடும் மறுநாள்

தூக்கிச் சொருகிய சேலையோடு

குளத்தில் வெளுத்த சலவைக்காரியின்

வெண் தொடைகளை விகல்பமின்றி பார்த்தது

சிறுநீரில் உயிரணுக்கள் கலவாத காலத்தில்

உள்ளம் போகும் தடத்தில்

உதைபந்தென இருந்த நாவு

இன்று சொற்களை தேர்கிறது

திறமையானதொரு சதுரங்க

ஆட்டக்காரனின் காய் நகர்த்தலாய்

பகிர்தலையும் புன்னகையையும்

புதைத்த இடத்தில்

மீந்த எலும்புத்துண்டுகளாய்

அவரவர் பால்யம்

(நன்றி: கணையாழி, 2003)
தூரன் குணா

கவிஞர் புகாரி

2007-10-12T17:20:00.000-07:00

இதயம் மீறும் எண்ணங்களால்
நாம் எழுந்து பறப்போமே
இதய நிழலில் இதயம் கிடத்தி
இன்னல் துறப்போமே

வெளிச்ச அழைப்புகள் என்ற பதிவின் ஆரம்ப வரிகள் இவை.

கவிஞர் புகாரியின் கைவண்ணம்.

நான் ரசித்த வரிகள்
-----------------------------------------------------------------------

சுனாமி பற்றிய கவிஞரின் கவிதையில் :

படுத்துக்கிடக்கும்போதேபயமாய் இருக்கும் கடல்,
எழுந்து நின்றால் என்னாவது !!

கடலை இவ்வளவு அருமையாக வர்ணித்தது யாருமில்லை.
--------------------------------------------------------------------------

எழுத்தாளர் முத்துலிங்கம் - கவிஞர் புகாரியைச் சிறப்பிக்கும் ஒரு இலக்கிய விழாவில் - கவிஞரைப் பற்றிப் பேசியது :

"நான் கருவான முதல் இரவு என் முதலிரவு இல்லையாம்",

"சுவர்களல்ல, அறைகளல்ல வசிப்போரின் கூட்டுயிரே வீடு",

"வருவோரும் போவோரும், கண்ணே இருப்போரின் தொடர்தானே"

போன்று கவிஞர் புகாரியின் கவிதைகள் முழுக்க தத்துவ வரிகளுக்குக் குறைவில்லை. தீவிரம் குன்றாத இவருடைய படிமங்கள் மனதிலிருந்து இலகுவில் மறைவதில்லை.

ஓர் அனாதைக் குழந்தையை அவர் வர்ணிக்கிறார், பாருங்கள்.

'வேரொழிந்த பூங்கொடியோ, கண்ணே விரலெறிந்த நகச் சிமிழோ'

இன்னும் சில இடங்களில் கவிஞரின் வார்த்தைகள் சிறு காற்றில் சலசலத்து ஓடும் சிற்றோடைபோல இனிமையாகக் காதிலே வந்து விழுகின்றன. இப்படி நுட்பமான வெளிப்பாடுகள், உணர்ச்சி விளிம்புகளில் உறையும் கவிஞர்களுக்கு எப்போதோ ஓர் அபூர்வமான தருணத்தில் மட்டுமே கிட்டுபவை.

பச்சைமிளகாய் இளவரசி என்ற கவிதையில்,

"மாலை கவிழ்ந்தால் தளிர் மடியில் என் மனதின் கிழிசல் தைக்கின்றேன்"

என்கிறார்.

மகளுடைய சுரீர் கோபத்தைச் சொல்லும்போது

'நாக்கின் நுனியோரம் பொன் ஊசி உறைப்பு' என்கிறார்.

இத்தனையும் கவிஞர் புகாரியின் கவிதைகள்
---------------------------------------------------------

கவியரசின் அனுபவக் கவிதை

2007-10-10T17:26:00.000-07:00

பிறப்பின் வருவது யாதெனக் கேட்டேன்

பிறந்து பாரென இறைவன் பணித்தான்!

படிப்பெனச் சொல்வது யாதெனக் கேட்டேன்

படித்துப் பாரென இறைவன் பணித்தான்!

அறிவெனச் சொல்வது யாதெனக் கேட்டேன்

அறிந்து பாரென இறைவன் பணித்தான்!

அன்பெனப் படுவது என்னெனக் கேட்டேன்

அளித்துப் பாரென இறைவன் பணித்தான்!

பாசம் என்பது யாதெனக் கேட்டேன்

பகிர்ந்து பாரென இறைவன் பணித்தான்!

மனையாள் சுகமெனில் யாதெனக் கேட்டேன்

மணந்து பாரென இறைவன் பணித்தான்!

பிள்ளை என்பது யாதெனக் கேட்டேன்

பெற்றுப் பாரென இறைவன் பணித்தான்!

முதுமை என்பது யாதெனக் கேட்டேன்

முதிர்ந்து பாரென இறைவன் பணித்தான்!

வறுமை என்பது என்னெனக் கேட்டேன்

வாடிப் பாரென இறைவன் பணித்தான்!

இறப்பின் பின்னது ஏதெனக் கேட்டேன்

இறந்து பாரென இறைவன் பணித்தான்!

'அனுபவித்தேதான் அறிவது வாழ்க்கையெனில்ஆண்டவனே நீ ஏன்'

எனக் கேட்டேன்!

ஆண்டவன் சற்றே அருகில் நெருங்கி 'அனுபவம் என்பதே நான்தான்' என்றான்!

-------------------------------------------------------------------------------

என்ன ஒரு அருமையான கவிதை - அனுபவம் என்பது எல்லோருக்கும் அமையாது. ஒன்றினை உணர வேண்டுமானால் அதுவாக மாற வேண்டும். அப்போதுதான் அதன் அருமை புரியும். கேள்வி ஞானம் மட்டும் போதாது. கவியரசின் தத்துவக் கவிதைகளில் - படித்ததில் பிடித்த கவிதை

அறிமுகம்

2007-10-10T17:19:00.000-07:00

வலையுலக நண்பர்களே !

தினந்தோறும் பல புத்தகங்கள், செய்தித்தாள்கள், சுவரொட்டிகள், விளம்பரங்கள், துண்டுப் பிரசுரங்கள் எனப் பலவற்றைப் படிக்கிறோம். அவற்றில் சில வரிகள் - சில சொற்கள் - சில தொடர்கள் மனதில் சட்டெனப் பதிகின்றன. அவற்றை எல்லாம் இங்கு எழுதி வைக்கலாம் என ஒரு எண்ணம். தொடங்குகிறேன்.